Slysavarnadeildir

Innan Slysavarnafélagsins Landsbjargar eru starfandi um 33 slysavarnadeildir, en deildirnar eru margvíslegar og sinna ýmsum verkefnum. Starf deildanna hefur þróast í gegnum tíðina, en slysavarnahugsjónin sem leiddi til stofnunar Slysavarnafélags Ísland 1928 hefur þó alla tíð verið rauði þráðurinn í starfinu.

Sumar deildanna sinna nánast eingöngu fjáröflunum, bæði til þess að standa við bakið á björgunarsveitum í sinni heimabyggð eða til þess að fjármagna ýmsar gjafir til stofnana, félaga og samtaka í samfélaginu. Fjáraflanir eru margvíslegar og skemmtilegar. Aðrar deildir hafa að markmiði að sinna hinum ýmsu slysavarnaverkefnum. Í gegnum tíðina hafa áhersluverkefni í slysavörnum verið margvísleg. Á fyrstu árum félagsins voru slysavarnir á sjó aðaláhersluefnið, enda sjóskaðar tíðir. Mikill árangur hefur náðst í öryggi á sjó og áherslurnar því aðrar í dag. Fjölbreytt  verkefni eru unnin innan deildanna. Slysavarnir barna og aldraðra eru megin verkefni flestra deilda ásamt umferðaröryggi og notkun endurskinsmerkja auk fjölda annarra verkefna.